کیا فرماتے ہیں علمائے دین و مفتیان کرام اس مسئلہ میں کہ انجکشن کے ذریعہ خون نکالنے سے وضو ٹوٹے گا یا نہیں؟جبکہ وہ بہا نہیں ہے جواب عنایت فرمائیں؟

المستفتی:- مولانا غلام مرتضیٰ نعیمی ممبئی

الـــــجـــــــواب بـــعون المــلک الـــوھـــاب:-صورت مسئولہ میں وضو یقیناً ٹوٹ جائے گا اس لئے کہ بذریعہ سیرینج جو خون ٹیسٹ وغیرہ کے لئے نکالا جاتا ہے وہ بہنے کے قابل ہوتاہے کہ اگر وہ خون سیرینچ سے باہر ہوتا تو ضرور بہتا۔ شرح وقایہ جلد اول ص 74 “إذا فصد وخرج دم كثير وسأل بحيث لم يتلطخ رأس الجرح فإنه لا شك في الانتقاض مع أنه لم يسأل الي موضع يلحقه حكم التطهير” اور فتاوی رضویہ میں ہے کہ “لا يشترط فى النقض بما من غير السبيلين الخروج بالسيلان على ظاهر البدن ” اھ( فتاوی رضویہ ج 1 ص 55 قدیم )۔اور در مختار جلد اول ص 285/286 میں ہے “المراد بالخروج من السبيلين مجرد الظهور وفي غيرهما عين السيلان ولو بالقوة، لما قالوا: لو مسح الدم كلما خرج، ولو تركه لسال نقض وإلا لا”اھ

       نیز بہار شریعت جلد اول ص 305میں ہے کہ ” جونک یا بڑی کِلْی نے خون چوسا اور اتنا پی لیا کہ خود نکلتا تو بہہ جاتا وضو ٹوٹ گیا ورنہ نہیں ” اھ پس مذکورہ بالا ادلہ سے واضح ہوا کہ سیرینج میں خون نکالنے سے بھی وضو ضرور ٹوٹ جائے گا جبکہ وہ اتنا ہو جو بہنے کے قابل ہو اگر چہ وہ اعضائے جسم پر نہیں بہا لیکن اس میں بہنے کی صلاحیت موجود ہے کہ اگر سیرینج میں نہ لیا جاتا تو ضرور بہتا۔ واللّٰہ تعالیٰ اعلم بالصواب

      عبد المقتدر مصباحی

خادم دارالعلوم اہلسنت فیض النبی کپتان گنج بستی یوپی

kya syringe se khoon nikalne se wazu toot jata hai

کیا سیرینج سے خون نکالنے سے وضو ٹوٹ جاتا ہے؟